Encö orunse ince tó l’ocajiun, dal Consei de Cöra enfora, mo ince a ennom dla Ploania, da rengrazié Giovanni.

Tö ès sté por 43 agn member dl Consei de Cöra y de chisc por ben 33 agn sciöche president, olá che t’as fat tröp de ben por nosta comunité.

Ben tröc laurs, aste, adöm a tü colauradûs, condüt ennant y slüt jö. Sot a töa responsabilité podunse avei encö na bela dlijia ressanada y ampliada cun n orghe nü, na capela di morc, l’ciampanin dorteré sö cun l’gherist nü dles ciampanes, la cortina engrandida y n gröm d’atri laurs, ch’i ne savun ma gnanca.

Düc chisc laurs è sogü stá acompagná da nia püces bries, dubbi y … samben ince val’critica. Da fá dert a düc, savunse, él der rie, mo empó este sté bun de i porté a fin cun gran convinziun cristiana y empegn te töa funziun sciöche president…y i podun dí, che t’as fat n bun laur.

L’laur che t’as spo albü ciamó da acompagné funziuns, encuntades, sontades y tröp d’ater…chel saste ma tö y Chel Bel Dîe. Sciöche i an aldí endant, aste ince ciamó tut sö i ultimi agn l’impegn, da jí y slü jö l curs por condü les Liturgies dla Parora.

Cun tó bun ejempl s’aste acompagné söl tru dla fede y deboriada sperunse de podei jí ennant, sperenn söl contribut atîf de tröc de nos laics. N’en vara pö de podei garantí ennant da fá comunité y da s’encunté düc atló, te dlijia, por aldí la Parora de Dîe.

Porchel Giovanni- orunse encö te dí da pert de nos düc atló n gran y fort dilan por düc chisc agn che t’as lauré por l’ben de nosta Ploania.

N gran dilan ti vá samben ince a töa familia, a töa fomena y a tü mituns, che t’á sogü daidé te trepes situaziuns, t’á sostegní y t’á dé forza, y che á gonôt pazionté por l’tomp che te stês jö dla familia por te meter a desposiziun de nosta comunité.

Por düc i miric sarâle Chel Bel Dîe che te paiará, mo nos, sciöche segno de reconescionza, te sorandun na scincunda. 

Cöst’ora dess simbolisé l’ laur de 43 agn, l’tomp che t’è gnü scinché da Chel Bel Dîe y che t’as salpü da anüzé ince por l’ben di atri.

Ara dess ince raprejenté l’tomp che gnará, chel da sté deplü te töa familia, ti jí do a to laur y a töes ligrezes, mo ince da te dé ca ennant te pici y gragn sorvîsc, ch’i te periun ennant da sorantó por nosta comunité.

Giovanni, de cör n bel gran dilan de döt cant y döt l’bun por l dagní.

Gertrud
por l’Consëi de Ploania