Home
Noeles
La scuadra de Ampëz á davagné, do l'ediziun 2016, ince l'ediziun atuala rovan al pröm post (Foto: Ofize Sorvisc sport de scora)

Tornê de hockey interladin 2017: Ampëz davagna l’otava ediziun

Ince tl 2017 él gnü organisé le tornê de hockey interladin dles scores mesanes dles valades ladines, chësc ann él gnü organisé l’evënt sportif a Alleghe.

La ediziun 2017 dl tornê de hockey danter les scores mesanes dles valades ladines é jüda a piz dan da püch tl stadium dla dlacia „Zunaia“ a Alleghe. Jogadus de Gherdëna, dla Val Badia, de Fodom/Alleghe, de Ampëz y de Fascia á combatü por le titul „Campiun de hockey interladin 2017“. Le prömes trëi posiziuns é jüdes a Ampëz, Gherdëna y Fodom/Alleghe.

Dal 2010 vëgnel organisé vigni agn n tornê de hockey danter les scores mesanes de Gherdëna, dla Val Badia, de Fodom/Alleghe, de Ampëz y de Fascia. I pröms trëi agn é le tornê gnü metü da jì a Alleghe, daldô tl 2013 te Gherdëna y tl 2014 te Fascia, tl 2015 tla Val Badia y spo l’ann passé a Cianacëi. „Le tornê de hockey é na buna ocajiun por i scolars y les scolares dles valades ladines y da se confronté te n spirit de fairness y de barat cultural“, á sotligné l’intendënt ladin Roland Verra che á tut pert ala premiaziun.

Vigni valada ê rapresentada al tornê cun öna na scuadra y á soghé cun dötes les scuadres dles atres valades. Le pröm post á arjunt la seleziun de Ampëz, al secundo post é rové Gherdëna, al terzo post la scuadra da Fodom/Alleghe, spo s'á tlassifiché cuarta la seleziun de Val Badia y cuinta la Val de Fascia. La proscima ediziun tl 2018 gnará organisada a Sëlva y la responsabilité organisativa sará dl Ofize Sorvisc sport de scora dl’Intendënza ladina.

 

Foto 1: La scuadra de Ampëz á davagné, do l'ediziun 2016, ince l'ediziun atuala rovan al pröm post (Foto: Ofize Sorvisc sport de scora)

Foto 2: La seleziun dles scores mesanes de Gherdëna é rovada al secundo post (Foto: Ofize Sorvisc sport de scora)

Foto 3: La scuadra de Alleghe/Fodom é rovada terza (Foto: Ofize Sorvisc sport de scora)

Foto 4: La seleziun dles scores mesanes de Fascia (Foto: Ofize Sorvisc sport de scora)

Foto 5: Tornê de hockey interladin 2017: foto de grup (Foto: Ofize Sorvisc sport de scora)

Foto 6: Tornê de hockey interladin 2017: foto de grup (Foto: Ofize Sorvisc sport de scora)

valutaziun
Submitting your vote...
stampè