Home
Noeles

Ativites dl’Uniun dles Ëles da San Ciascian 2016

Ai 4 de merz ele stè le “Weltgebetstag der Frauen”. Tema è stè “Chi accoglie un bambino accoglie me”, dediché a les ëles de “Cuba” cun la Santa Mëssa a Oies metüda adüm y organisada dales ëles dl Uniun.


Ai 18 de merz, dütes adüm, unse perié la Via Crucis.

Ai 1 de má, in ocajiun dl “Dé dla Vita”, bëgn 12 de pici viadus cun sües families á tut pèrt ala funziun organisada dal grup dl Uniun, stlujan jö cun en pic renfresch che è ocajiun de se cunësce damí y de se sintì tuc sö tla comunité. Ince chësc ann á l’uniun organisé en anfora pur l’Ega Santa a vigni viadùm na bela ciandëra y na mappa de informaziuns sura l’Bato.

Ai 21 de má, adüm ala Unun di Ëi da San Ciascian, ele gnü organisé en curs da fa “grillen”, sö tla bela strutüra dl Ciamp dl Sport a San Ciascian. Le curs, tigní da Pire Rubatscher da Pidró/La Val cun gran savëi, é dër garatè ince giulan a le bel tëmp y a la bela udlada che an á da chël post.

Ai 23 de má se unse abiné a dí la Corona de mà.

Ai 12 de jügn el gnü tigní la Segra: les cater Uniuns di Stüdafüch, Musiga, Uniun di Ëi y Uniun dles Ëles da San Ciascian à colaborè por che la jënt dl paisc podess fa na bela festa che è gnüda stlüta jö cun i iodlers ligerzins dl Conturines Echo (Gisela Pizzinini & Co.).
Intratan l’aisciüda, in ocajiun dla Festa dles Antles y dl Cör de Gejù, se crüzia la Uniun dles Ëles da purtè S. Anna. Te chëstes purciuns vëgnel vistì rispetivamënter l’guant da paur y la Tracht.
Ti mëisc de lugio y agost á la Uniun dles Ëles, cun le “Grup dles Turtres” (en grup de ëles che se abina regolarmënter a fá turtres), fat tröpes turtes (genau 3.035 turtres) da vënn a sciori y a jënt dl post in ocajiun dla festa dl paisc dl mercui. Chësta festa è gnüda spo tignida indüt cater iadi fora pur l’isté.
Dé dla Vita
Curs da grillen

Ai 15 de setëmber el gnü fat la gita de chëstes Ëles che á fat turtres intratan l’isté, jan jö a Venezia aulà che al é stè dër interessant. Püch de do, ai 21 de setëmber á i Stüdafüch ciamò paié na bona cëna al Hotel Armentarola a chësc grup dles Ëles che fej turtres. Al é en servij che vëgn dër aprijé y che porta ince en bel sosctëgn economic a la Uniun di Stüdafüch.

Ai 27 de setëmber el gnü organisé dan misdé le curs sön les erbes da medejina, cun Gottfried Hochgruber a San Laurënz; domisdé le curs è jü inant cun Dorothes Hilber che á mustrè sciöch an fej cosmetics naturai (shampoo, pasta dai dënts, deo….).

Ai 4 de otober unse festejé la Festa dles Copies. La Uniun dles Ëles se crüzia de invié les copies, arjigné ca la mëssa y de dó ciamò en bel “brunch”, aperitiv cun picera marëna y “torte da noza”. Püc dis dò vëgnel ince partì fora les fotos.

Tl mëis de otober, ai 13, el gnü fat ince en pelegrinaje a Heilig Geist, aulà che Siür Heinrich Ellecosta se à dit na bela Santa Mëssa; do Mëssa unse albü la marëna al Talschlusshütte.

Ai 16 de otober, adüm ai scolars y maestri, unse arjigné ca l’Altè y la Santa Mëssa pur la festa dla Racoiüda.
Pur stü jü le mëis de otober, ai 24 en valgünes dl Uniun à tut pèrt a l’Impulstag a Al Plan.
Ai prüm de novëmber, pur la festa da Gnissant, ele gnü fat les ciandëres pur i morc’ tl ann 2016. Ince intratan l’ann, canch al mör en ëla, ti vëgnel portè te ciasa na ciandëra, al vëgn dit la corona y paié na mëssa por la defunta cumpagna.

Ai 10 de novëmber à l’Uniun dles Ëles daidé le Grup dl Volontariat a arjigné ca la festa di berbesc.

Ai 12 de novëmber unse arjigné ca le renfresch pur chi che á partecipé a la preparaziun al Bato.

Ai 24 de novëmber è jüdes les ëles te Ciasa de Palsa a festegié le cumplì di agn di berbesc.

Ai 12 de dezëmber el stè le Guldanom di Ëi y dles Ëles y dedò sun jüs a mangé la pizza tl bar “La Vedla”.

Ai 2 de dezëmber, por le secundo ann, à l’Uniun di Ëi adüm a l’Uniun dles Ëles daurì la Ütia dl Paisc da Nadè. Chësc ann á les Ëles ince cöt pan te n fur da zacan. La Ütia è restada daverta fina ai 8 de jená, giulan a na bona colaboraziun de tröc’ che á fat para y che an tol l’ocajiun por rengrazié. Le ricavat da chësta iniziativa vëgn partì sö tra les dües Uniuns y na terza pert vëgn dada in beneficiënza a l’Associaziun S. Vincenzo, pur daidé families dla Val Badia che á debujëgn.
Te chësc ann 2016, do avëi pur plö agn alalungia purtè inant y zoruch tais y Besteck pur les varies ocajiuns, se à l’Uniun dles Ëles cruzié de arjigné it Besteck, tais, goti y na mascinn dal cafè pur l’salf de Calonia. Tulun l’ocajiun pur rengrazié La Cüra da San Ciascian, la Cassa Raiffeisen y le rapresentant dl “Caffè Dersut” che se à dè en bel contribut pur paié chësc patüc che restarà a disposiziun de dütes les Uniuns da San Ciascian.


Uniun dles Ëles San Ciascian, 14.02.2017

valutaziun
Submitting your vote...
stampè