Home
Noeles

“Adöm él plü bel” - Begngnüs a nosta festa

En jöbia ai 25 de ma á i scolars y insegnac dla scora elementara da San Martin de Tor invié i geniturs a na picera festa intitolada “Adöm él plü bel ” tl Istitut Ladin.  La festa ai geniturs é gnüda fata sciöche conclujiun dl proiet sura l'amizizia intitolé “Adöm él plü bel”, che é gnü fat ia por l'ann tla scora elementara da San Martin.

I scolars á saludé i geniturs cun na ciantia che i scolars á metü adöm cun maestra Angelina y che baia de scora, amizizia  y compagnia. Propi chisc é sta i argomënc che á acompagné döta la manifestaziun. Vigni classa á purté  dant na ciantia, na rima, en balet o en pice teater. Metü man á i scolars de pröma elementara cuntan sö sciöche an se aldüda fora pur l’monn. An é jüs inant cun la ciantia “Di che colore è la pelle di Dio” portada dant dai 9 mituns/ans de secunda elementara y spo cun na ciantia africana. Ai á ince porté dant tres na rima y cun de bí dessëgns che ai á fat te classe, ciche ai fej intratan le tëmp de scora: imparé, daidé i compagns, sughé, ste adöm, mo ince porvé da se gní, pordené, rengrazié por döt le bel. “Adöm él bel da ste, ester amisc fej bun, pordené y fa pesc” chisc i slogans di placac. Ara é jüda inant cun en pice teater porté dant dai scolars de cuinta che baia de amizizia y partí. Da rí é stades le “barzelettes” portades dant dai 4 mituns/ans de 3 elementara. Spo an podü odëi les registraziuns che i mituns á fat te scora y che baia de ciche al ó dí por vëi sté adöm. Ai se á ince mostré tres fotografies en per de momënc dl ann de scora 2016/2017, sciöche dla jita, dl dé di lëgns, dla ricreaziun, de momënc tratan les leziuns, de esperimënc, de festes de complean, de retrac dl concurs a dessëgn metü a jí dal Cassa Raiffeisen Val Badia. La festa é jüda a piz cun na rima a maesta Angelina y al diretura dr. Otto Moling che jará tosc en ponsiun. Da pert di geniturs en gran dilan ai insegnac pur le gran impëgn; al diretur y a maestra Angelina por düc i agn de bun sorvisc te scora, al sostëgn da pert dal Cassa Raiffeisen  y suradöt ai mituns pur chësc invit a “süa” festa. Al é ste dër bel  da odëi tan tröp che ai á fat intratan chësc ann de scora y da odëi cun ci ligrëza che ai á porté dant ciche al ó dí ste adöm, se gní y …amizizia. Ince nos gran se tolarun para tröc spunc pur jí inant plü contënc y cun plü ligrëza.

valutaziun
Submitting your vote...
stampè