Home
Noeles

Premio Sánta Maria Maiou ai alpini da Fodom

L é ju al Grop Alpini Col de Lana sto ann l  premio Sánta Maria Maiou, che ogni ann Comun e Union dei Ladins da Fodom i sporc a na persona o associazion che s’a de fora per la comunité fodoma. La soeja ulache chëst rconosciment ven dé fora l é chëla de la gran festa de Sánta Maria Maiou che oramei da cuaji 40 agn ven fata a La Plié. Na festa enviada via ntra la fin dei agn ’70 e i prums agn ’90 da Benigno Pellegrini e l’enlouta prescidenta de l’Union dei Ladins da Fodom Bruna Grones. Na festa che ntei agn, coche recugnësc troc che la veiga dal defora, a sapù mantignì la sou de na tradizion e no n é tomada ntel puro folklor. La giornada, come da tradizion, l’é scomenciada co la S.Mëssa solene nte gliejia da La Plié acompagnada dal Coro de Gliejia S.Iaco che a la fin, ence chësta na tradizion, l a lascé l lerch a “sue” ële per cianté davánt ai mac e cësć de ciof portei a fè benedì da le ële col guánt, la ciancion “Giardino di fiori”, deventada oramei n inn de chësta festa. A la jent che a emplenì la gliejia defora se n’a enjonté n’autra mascia, souradut sciori, che no n a volù mancé a chëst apuntament e che s’a sbracé per fé la foto a dute le raprejentánze col guánt n poja sui scialins de gliejia. Davò la pert religiosa l’é piada via la sfilada fin jun Plaza Nuova de le ële col guánt, i ciar de le Vijinánze de Ornela, Reba, Salejei e Pala Daghé, i scizeri, l Grop da Bal, raprejentánc dei bacagn co le machine da sié bele fate su de ciof, i setous co le fauc e la Bánda da Fodom che a acompagné  e dé l vare con sua mujica. N sfilada e sun paladina ence le autorité con davántfora l Capocomun Leandro Grones, scior pleván don Dario Fontana, la prescidenta de l’Union Generela di Ladins dla Dolomites Milva Mussner, la prescidenta de l’Union dei Ladins da Fodom Manuela Ladurner e l assesora a la cultura e turism Michela Lezuo che a porté suoi saluc ufiziai. La pert ufiziala de la manifestazion l’é juda ennavánt co la consegna de la pergamena e la Stëla da mont d’arjent, opera del artist trentin “Mastro7” al grop alpini Col de Lana, prejent con envalgugn de suoi esponenc storizi viśei dal capogiro Luca Deltedesco. La “laudatio” l’é stada fata dal consilier de l’Union dei Ladins da Fodom Stella Palla, che l à recordé la storia de l’associazion, metuda su davò la Pruma Viera e dute le ativité portade ennavánt nte chisc agn; n particolar per tignì su l ricordo dei evenc de le doi viere, da ultimo la Festa dei ceri a Plán de Salejei, ma ence da spëss a fin de ben e de solidarieté. Coche l é scrit n curt nte la motivazion del premio:”Per ester tres fedeli a vost ideal “daidé i vis per no desmentié”. Per ester tres damprò ai debujens de la jent e rencuré i luosc che ten vif l ricordo d e la gran tragedia che l é sté la viera per costruì dì per dì la pesc.” N pico vajo per i ciof l é l ricordo che l’Union dei Ladins a enjigné ca sto ann da scinché a le ële col guánt.  Na prejenza che va njù da envalgugn agn encà. Zerto, na conseguenza dei temp che muda. Ma ence n apél a tourné a se l vestì a dute chële che nte sti agn, per desvalive motivazion, l a lascé nte almierch. Sánta Maria Maiou l’a saré ite n fin setemana teis de apuntamenc nta Fodom, scomencé bele l vender col tendon de la Bánda da Fodom sa na Reba, che domënia 13 a ospité ence la sfilada de le associazions de la val, dei ciar de le  vijinánze, che sto ann ava per tema la noza da nzacan e a la Bánda da Fodom, che auna a la Mujiga “Caterina Lánz” da L Plán de Mareo e la Filarmonica “Le Prime Lus” de Bertiolo ( Ud ) a metù a jì la pruma rassegna de bánde dal titol:”Note che s’enconta”. ( SoLo )

valutaziun
Submitting your vote...
stampè