Home
Noeles

Notizies dal Aiut Alpin Dolomites

Te chisc primes dis de setëmber caraterisei dal burt tëmp y frëit se n resiova puecia jënt a se arpizé tla Dolomites y de cunseguënza fovel ënghe manco cherdedes de aiut. N ntervënt fova da fé sun la Marmolada ulache n ëila dl Polen che fajova la via normale per rué sun punta Penia ie sbrisceda ora tuman te na sfënta dl dlacier. Per fertuna ie i 3 cumpanies che fova pea stac boni de la tenì tla corda y nsci ie la mé tumeda tl uet per puec metri. Ma l problem fova che i ne fova nia boni de la tré su. Nsci à ëi cherdà aiut y cun l joler iel unì julei sun l post mo 3 judacrëp de Fascia che à judà a la tré ora dla sfënta. Ntan chësc ntervënt fovel mo da purté aiut a 2 tudësc che se nfidova nia plu inant sun la dlacia dla Marmolada. Nsci i an ciariei n hovering y julei nchin Pian dei Fiacconi. Pona iesen jic a tò i 3 judacrëp de Fascia che fova tl auter ntervënt y n à julà duc al segur.

N segondo ntervënt tla montes, ma chëst iede pra na utia da mont fova sun l Becherhaus ulache n ëila se ova stort na ciavidla y ne fova nia plu bona de dé sëura l pe. La ova n gran flucion sun l spinel che pesova dassënn y chësta ie ënghe stata la gauja che la se à nzutà. Nsci la an ciarieda y juleda te spedel de Sterzing.

Sun la Fanealm fovel da purté aiut a na turista de 55 ani che fova burdleda ju per feter 100 metri da n rone ert. La ova mel mpue dloncora y nsci la an riesc meneda te spedel per n cuntrol plu avisa.

Ora de chël iel stat plu ntervënc saniteres. Danter l auter a Ums sëura Fië ulache n jëunn de 35 ani fova tumà ntëur te stala. L dutor dl Aiut Alpin Dolomites che fova prësc sun l post ti à dat la prima cures y al jëunn ti jivela prësc miec ënghe sce l cuer ne batova mo nia regularmënter. Perchël l an julà te spedel de Bulsan. L fova bel tert y n à te chësc cajo fat l jol de reviers da Bulsan a Pontives tl scur cun la nueva tecniches de jol.

A Ciavalëis fovel da julé per n ëila de 46 ani che ova na sangheda tl cë. Chësta an julà te spedel de Trënt y a San Ciascian ova de bujën de n dutor n ëila de 85 ani che ova problemesc cun l cuer. L dutor la à stabiliseda y do chël la an juleda te spedel de Bulsan per n cuntrol plu avisa.

Te chisc ntervënc ie suënz ënghe che juda pea i uemes dla ambulanzes che ie sun l post.

valutaziun
Submitting your vote...
stampè