Home
Noeles

Notizies dal Aiut Alpin Dolomites

N sada ai 2 de dezëmber a scumencià inò l servisc de socors dl Aiut Alpin Dolomites. Cun l joler cueciun H135T3 dla dita Airbus vën meneda la scuadra cun l dutor anestesist, n judacrëp dl CNSAS o dl BRD, n spezialisà cun la binda, l pilot y coche bel da 30 ani incà per dut l inviern ënghe n patron de n cian cun si cian da levina. Nuviteies iel chëst ann doves de majeres. Dantaldut che n julerà ënghe de scur cun l sistem night google vijion. L servisc ie nsci garantì dala 8 daduman ala 8 da sëira, ma n ie a desposizion te caji de emergënza ënghe nchin la 10 da sëira. La segonda nuvità ie che per cherdé aiut ie nia plu da cherdé su l numer 118 ma l numer unich de emergënza 112 ulache n se culeghea riesc cun la zentrela de emergënza sanitera de Bulsan che coordinea pona ënghe i ntervënc.

 

L prim dì de lëur à riesc scumencià cun 2 ntervënc bel da duman. L prim te la valeda de Ulten ulache n ëila de 88 ani dl post ova problemec saniteres y do chël n ntervënt per n nzidënt sun streda tla valeda de Passeier. 2 auti fova fric adum y 2 persones ova riesc de bujën de la cures de n dutor. Tramdoi ie stai julei te spedel a Maran.

 

Ënghe l segondo dì de servisc a scumencià riesc daduman cun n ntervënt a Urtijëi ulache ti ova striscià l bot a n ël dl post. A Jenesien ie unì cherdà l joler per n ël dl post de 84 ani che se ova ncucià a maië n toch de cërn pra marenda. Ël stentova dassënn a tré l fla y de cunseguënza ne batova nia plu l cuer. L dutor ie stat bon de l reanimé sun l post dan che l ie pona uni julà te spedel de Bulsan.

valutaziun
Submitting your vote...
stampè