Home
Noeles

Uniun Sport San Ciascian - bilanz positiv por l'ativité 2017

Tratan l’ann 2017 à indô l’Uniun dl Sport da San Ćiascian porté fora cun suzess süa ativité sportiva.

 

Tla palestra dla scola elementara da San Ciascian el gnü tignì for por düt l’ann cursc de ginastica cun Clara Marisa. Tratan l’invern él ince sté en grup che vigni edema se á incunté tla palestra dla scola mesana a La Ila a fá ginastica.

 

La gara dl paîsc da San Ciascian portada fora ai 2 de aurí 2017 é ruvada a süa XXV. ediziun. La tradizionala competiziun sportiva söi ski vëgn metüda a ji dala Uniun dl Sport y dala Scola de schi. 80 i partezipanc scric ite ala gara portada fora sön la pista Ciampei al Piz Sorega.

L’miú tëmp dl dé è gnü fat dal jonn Ploner Manuel che á archité le cronometer sön 32,24 se lascian insciö düc i atri concorrënc ia dedô. Pró les ëles è sté le miù tëmp chël de Pescollderungg Michaela cun 37,00.

In chësc dé de gara ess sambëgn düc urü ciamó fá en bel resultat a fin de sajun y vadagné te süa categoria. Alzé fora urunse insciö i atri mius tëmps de gara che á ince porté tröc concorrënc söl plö alt scalin dl podio: Dalpiano Sergio cun 32,50; Rudiferia Andy cun 1.01,15; Pezzedi Emma cun 45,39; Canins Denise cun 46,76; Manco Katharina cun 37,57; Clement Julian cun 44,13; Crazzolara Thomas cun 43,73; Clara Simon cun 36,76; Crazzolara Kian cun 40,03; Glira Giuseppe cun 39,65; Tasser Alma cun 39,56 y Glira Klaus cun 36,34.

Le trofeo familia 2017 è gnü vadagnè dala familia de Pezzedi Ivo y Gaby. Le secundo post por le trofeo familia è jü ala fam. de Pedratscher Ivan y Michaela y le terzo post ala familia de Pescollderungg Thomas y Monika.

Da sëra el gnü metü a ji tla Ciasa Janbatista Rinna, la cëna por düc i scric ite arjignada cà dal staff de Tony dl Hotel Armentarola. La surandada dles copes ufrides dala Cassa Raiffeisen Val Badia y di pesc á dedô fat sluminé suradüt tröc ödli di mituns che sla confortá dassëgn da pié dô les copes y i pesc vadagná.

En gran giulan a düc chi che á daidé fá garaté la XXV. ediziun dla gara dl paisc da San Ciascian .

 

Bel defata dô che l’invern è jü a piz an metü man cun les ativités sön ciamp dl sport. Suradöt vëgn chiló sughé al palon y a beach volley.

Tratan les vacanzes da d’sté á l’Uniun Sport metü a ji en curs sportiv cun Emanuel Gravino. Al á porté fora le curs “sport, etica e divertimento”. Ël à salpü da trasmët tröpa lighrëza a mituns y jogn che à insciö albü l’ocajiun de imparè a fa desvalies ativités sportives.

 

La gestiun dla zona sportiva che à tl 2017 indô davert düć sü sorvisc cun le scumenciamënt de lugio cina ai 10 de setëmber à indô albü gran suzess. L bel tëmp à contribuì a promöi les ativités alaleria, fajan ince registrè na bona la frecuënza söla zona sportiva dl paisc. Scialdi tröć mituns, jogn y nia ma jogn, mo ince ghesć chir sö la bela zona sportiva por l’atraziun y poscibilités dl tëmp lëde che ëla pîta. In giulan a Irene, Valentina, Janpaul, Maximilian y Iaco che à fat bun sò sorvisc por cunt dl’uniun dl sport y à salpü da acuntenté düć i sportivi, vijitadus y frecuentadus dla zona sportiva.

Fora por l’isté 2017 el ince gnü sughé tröp a “beach-volley”. Chiló en giulan ince ala uniun dal sport da La Ila cun Degrandi Giorgio che á porté fora desvalis cursc y ince competiziuns sportives cun tornois de “beach-volley”.

 

Da d’alton an metü a ji en curs de “LnB Motion” cun Marisa Clara. Chësc curs è gnü tignì da sëra tla palestra dla scola elementara. L’movimënt pò tò demez pici mai gaujà dal stil de vita. Sintì deplö l’corp por vire miú y aumenté la flessibilité. Ti pitê al corp le dër movimënt por se sté bëgn y resté sagns. Aprofondimënć sön “LnB Motion” pon ince ciafé sot a www.lnb-motion.de. Suradöt ëles da San Ćiascian à tut pert a chisc cursć che vëgn dër aprijà y è dër sagns.

 

L’ativité portada fora tratan l’ann 2017 á albü suzess. Suradöt la promoziun dles ativités sportives è dër aprijades. Söl ciamp dl sport, cun l’ativité dla scolina salterina á la uniun la poscibilité de fá conësc ai plö pici tres le jüch les ativités sportives desvalies. Chësc dëida renforzé tl corp y ince tl spirit y promöi ativités sanes.

Giulan ince ai volontars che garantësc desvalies sorvisc por l’uniun dal sport an insciö podü arjunje i obitifs metüs dan tal statut.

 

Recordé se urunse ince da Carlo Dalpiano, mëmber dl comité por bëgn 17 agn che sen è jü improvisamënter ai prüms de dezëmber 2017. Carlo fô dagnëra presente y portà intres te nost gruppo tröpa positivité y en cör ligherzin. Cun süa gran pasciun sportiva nes ál intres daidé tigní adüm te nosta uniun. Carlo de cör en bel giulan.

 

Uniun Sport Amatoriala San Ciascian

 

Thomas Pescollderungg – Pres.

 

 

valutaziun
Submitting your vote...
stampè