Home
Noeles

Scoltöres de nëi fora por le raiun dai schi da La Crusc

Dai 8 ai 10 de jená éle gnü metü a jí tl raiun dai schi da La Crusc a Badia n concurs de scoltöres de nëi da pert dl’assoziaziun turistica de Badia adüm a deplö scolars dla scora profescionala Cademia de Urtijëi. Les sis scuadres partezipantes á albü trëi dis de tëmp da realisé fora di cubs de nëi na scoltöra liada al tema “Panta rei”. Le tema de chësta ediziun é gnü chirí fora adüm al’artist badiot y curadú dl concurs Lois Anvidalfarëi, che ê ince a ce dla iuria.

Les sis scuadres ê formades da dües o trëi persones, anter chëstes ince studënc dala Serbia, dal Iapan, dal’Austria, dala Francia y sambëgn dala Talia. La scuadra che á davagné la secunda ediziun dl concurs de scoltöres de nëi a La Crusc ê metüda adüm da Loredana y Jennifer Taufer adüm a Gianluigi Zeni da Fiera di Primiero. Ai á formé fora dla nëi n pësc intitolan la scoltöra “Percorso”, che an pó amiré presciapüch jö da pe dla pista La Crusc. Loredana, che á albü l’idea y á svilupé le conzet, á dit che al ne é nia sté saurí da lauré cun la nëi, tan inant che ala ê bindebo murjela por via dles temperatüres nia dër basses y implö al á ince npü nevü.

Bel sö insom dlungia la dlijia da La Crusc á Patrick Senoner y Arduini Thabata cherié la scoltöra “Energia vitala”, dlungia la ütia Lee pon odëi la scoltöra “Das Dasein ist Rund” dl franzej Pierre Auzias y dl austriach Johannes Herster y vis-à-vis dlungia la ütia Nagler éle metü fora l’opera “Tic-Tac” de Marija Markovic dala Serbia y Geng ZhongQI dal Iapan, che rapresentëia n’ora te dües mans. Amesa la pista Santa Croce dlungia la ütia L’Tamá éle da odëia l’opera “The Flow”, dües föies cheriades da Davide Zeni y Alberto Boschetti y jö da pe dlungia la staziun a val dl lift á Ariele Trettel y Pietro Colmellere formé la scultöra “Around the World”.

Tó pert a chësc concurs é sté por düc i partezipanc na gran ligrëza, tan inant che l’ert por ëi é na gran pasciun. Le concurs se á stlüt jö cun la premiaziun en ocajiun dla cëna tignida tla ütia L’Tamá le mercui sëra, olache düc á podü sté adüm y ince se cunfronté sura les esperiënzes desvalies che ai á albü tla realisaziun dles scoltöres. Dütes les sis operes podaran odëi inant dlungia pista tl raiun da La Crusc a Badia ince tles proscimes edemes.

valutaziun
Submitting your vote...
stampè