Home
Noeles

La Giatiscima 2018

Julian Pizzinini y Richard Feichter nia da bate!

Sabeda ai 7 de auri el gnü tigní la 9° ediziun dla Giatiscima, gara de schi dl paisc da La ILa. La gara é gnüda organisada dal Uniun Sport La Ila y dala Scola de schi La Ila.   
In cësc ann se á incunté 17 atlec cun i schi da pels dales 7,30 jödapé dl lift de Gardenacia pur cumbate cuntra i 340 m de deslivel y ruvé pur prüms al travert sö Plan de Sponata. La tröpa nëi ciamó da ciafé á lascé pro da fa la roda dl vers dla Büja dl Lu sciöche dan da 3 ediziuns. A püc metri dal travert ê trëi atlec toch adüm: Richard Feichter, Nicolas Ploner y Andreas Pescoll. Nia tröp dalunc la prüma dles ëres, Melanie Ploner. Cun en sprint da dalunc á purvé Nicolas da bate Richard che á respugnü de forza y passé le jonn atlet ti ultimi metri. Andreas á passé le travert al terzo post. Pro i mitus é ste Emanuel Pescollderungg le plö asvelt.


Dales 9.30 á lascié chi da les pels le post ai atlec sön i schi. Do val pic problem tecnic, pur chël che l'organisaziun se scusëia, á la gara metü man cun i plö jogn. L'miú tëmp tra les portes á pur la terza ediziun de fila, fat Julian Pizzinini. L'ëla plö asvelta é stada Jasmine Bassetto.


Do che l'ultimo atlet á taié l travert se á düc i scric ite paré la fan tl Hotel Ladinia cun na bona marëna.
Dala üna domisdé á le degan benedí l'auto nü dl Uniun Sport La Ila y dedo el gnü tigni la premiaziun. Richard Feichter à pudü piè do l' trofeo in record de Sepl Rottonara y Julian Pizzinini l'trofeo in record de Edo Agreiter. La combinada pels/schi é stada davagnada da Richard Feichter. Ciafé la copa á ince la familia plö asvelta che é stada indo en iade chëla de Richard Feichter.
Sciöche la tradiziun ó, el gnü surandé en pest a Walter Frenademez sciöche atlet manco jonn y a Giorgia Tiezza sciöche atleta plö jona.
Dales trëi ela jüda inant cun la trata dla ola dla fortüna, olache 50 bi pesc á ciafé patrun.
Tratan düt l de el ste DJ Tino che á metü sö müjiga e che á spo ince stlüt jö la Giatiscima 2018 tl tert domisdé.


En bel giulan ti va a düc chi che á daidé y che á de ca pesc pur la Giatiscima.
En giulan sintí ti va ala Fraziun da La Ila, ala Cassa Raiffeisen Val Badia, a Skiservice Renato, al Hotel Ladinia, ai Lifc de Gardenacia y a Foto Dolomit.


La tlassifica y les foto dl de pon udei sot ala plata internet www.uslaila.it


Foto: Julian Pizzinini y Richard Feichter

valutaziun
Submitting your vote...
stampè