Home
Noeles

Müjiga de Badia Incunta la Spona

Con gran emoziuns tl cör y ödli de tröpa jënt el gnü ascuté sö les melodies plajores dl conzert d´aisciüda dla Müjiga de Badia, en domënia ai 6 de má 2018.

Do l salüt dl Presidënt Philipp Lerchegger, á la müjiga lascé aldí la „Regimentsparade“ de Antonin Zvacek, le „Downtown Divertimento“ de Johan de Meij, la „Belle Héléne“ de Jacques Offenbach y la „Star Wars Saga“ de Johan de Meij. Le toch "Born 4 Horn" de Fritz Neuböck é gnü suné adüm al grup de corns dla Val Badia, co á fat gran parüda dan paladina sunënn chësc toch dal sonn tan cialt y armonius.

 

La prüma pert dl conzert s‘ á slüt jö con les onoranzes a trëi componënc dla müjiga: Sara Canins (corn), Burchia Oscar (portabandira), trami 15 agn pro la müjiga y Massimo Palumbo (saxofon) 25 agn.

 

La secunda pert dl conzert é spo stada le "Highlight" de chësc dé: i amisc dla Spona á tut pert al proiet: "La Müjiga encunta la Spona". Bën 13 mëmbri dl Zënter protezioné da Pederoa á fat para con ligrëza y gran emoziun al conzert d‘ aisciüda. Mëisc alalungia ai emparé ete en per de toc, sonënn por le prüm iade n strumënt che ëi enstësc á podü se chirí fora. En valgügn mëmbri dla Müjiga de Badia s‘á tut l tëmp da ji jö La Spona con strumënc y notes, y ensciö ti trasmëter ai amisc dla Spona la ligrëza da pudëi suné n iade sön paladina adüm a nosta müjiga.

 

Nia da descri n‘é l´ emoziun che an ti udó ti ödli a chisc jogn y jones dla Spona, canche ai gné cardá sö un a un sön paladina, con só strumënt acompagná dal applaus dl gran publich, prejënt a chësc event. Mo ince a tröc musicontri y ala jënt tl publich ti conesción sora l´emoziun da udëi con ci ligrëza che chisc jogn se sentá jö sön só post por pudëi spo lascé aldí i toc´ ch ai á emparé.

 

I dirighënc dla Spona, Markus y Diego á salpü da maestré le gran grup di musicontri con i toc´ "Kaiserin Sissi Marsch" de Timo  Dellweg, "Skoda Lasky" de Jaromir Vejvoda y "Banana Boat Song" de Marcel Saurer, prejentés con maestría da Guido.

Le publich n á nia bazilé da damané dui bis con en applaus sterch.

 

Al n á nia falé i rengraziamënc a chi che á albü l´idea de chësc proiet, dandadöt a nosc dirighënt Fridl, co se lascia tres endo tumé ite val de particolar por süa Müjiga. Trés endó el bun da trasmëter süa pasciun y ligrëza y sües bones idees y da trá ite düta la jënt tal bel monn dla müjiga.

En gran giulan ti vá sanbën a Robert da Ciaminades, che á dediché tëmp y ligrëza da insigné jö sü assistís dla Spona y ti á ensciö trasmetü la vöia da suné y tó pert a chësc proiet.

 

En giulan ince al comitée y a düc chi che á daidé para al garaté dl conzert.

Le plü gran giulan ti vá sanbën ai compagns dla Spona che á arichí l‘ conzert y nos düc con süa presënza.

 

En giulan sanbën ince alla Cassa Raiffeisen Val Badia, co é tres dan man con só sostëgn finanziar.

valutaziun
Submitting your vote...
stampè