Home
Noeles

Le Zënter scolastich a La Ila vëgn ressané y amplié

De plü locai por la scora mesana, les scores altes y la scora de musiga tl Zënter scolastich a La Ila - la Junta provinziala á aprové la proietaziun dles lercs.

A La Ila dessel gní ressané y amplié les scores che é bele tl Zënter scolastich. Tratan i laurs gnarál ince amplié la lerch por la sënta prinzipala dla scora de musiga dla Val Badia, che á al momënt ma pücia lerch tl zënter scolastich.

La Junta provinziala á aprové ai 7 d’agost sön domanda dl assessur provinzial por les frabiches Christian Tommasini la proietaziun dles lercs por le zënter scolastich da ressané. „A chësta moda podunse ressané le frabicat scolastich, tigní cunt di bojëgns de lerch dles scores y dla ghiranza de locai implü por la scora de musiga, y anuzé le miú che ara vá sinergies danter les scores“, insciö l’assessur provinzial por les frabiches. Chësc investimënt important de feter 15,8 miliuns ti garantësc aladô de Tommasini al grup linguistich ladin strotöres de formaziun modernes por n insegnamënt atual aladô de formes nöies sön le post, por i feter 490 scolars y scolares de musiga y 302 scolars y scolares dla scora mesana y alta.

Do le ressanamënt y l’ampliamënt dess le Zënter scolastich ester de 6704 metri cuadrac; por la scora de musiga él preodü 937 metri cuadrac.

Al dess gní amplié y alzé le somas dl frabicat olache al é sëgn l’Istitut tecnich economich, le Lizeum linguistich y le Lizeum de sciënzes umanes. Implü él preodü le ressanamënt energetich dl frabicat. La pert a nord dl frabicat dla scora mesana dess indere gní trata jö y fata sö danü a na moda da avëi na majera lerch por locai por düc, sciöche l‘Aula Magna, l‘auditorium, la biblioteca, i locai por fá ginastica y na mensa. Tla secunda alzada dl frabicat sarál la sënta prinzipala nöia dla scora de musiga dla Val Badia. Implü gnarál ince fat danü i tec di toc de frabicat che romagn y fat ite danü i func dles classes.

Por ci che reverda la spartiziun di cosć y la realisaziun di laurs ó la Provinzia y le Comun de Badia lauré fora na convenziun. La proietaziun dles lercs é gnüda fata sön la basa de n stüde de fatibilité de Giuseppe Nagler dla Repartiziun provinziala Frabiches y sorvisc tecnics. Ala realisaziun dla proietaziun dles lercs á ince tut pert le Departimënt Educaziun y Cultura ladina, y plü avisa l’intendënt Roland Verra y l’ispetur dles scores Albert Videsott.
„Chësc intervënt pó y dess ince ester n stimul por che scora mesana, alta y de musiga laores ciamó deplü adöm a livel didatich y pedagogich; al é bele n valgönes idees por i conzec pedagogics, dantadöt tl ciamp dla musiga”, dij le diretur
dla Repartiziun provinziala Scora y Cultura ladina Felix Ploner. „Ara se trata de n investimënt che ciara al dagní, dantadöt por i mituns y la jonëza dla Val Badia, y é porchël ince por döta la jënt ladina de gran importanza“, sotrissëia
l’assessur provinzial por la scora y cultura ladina Florian Mussner.

valutaziun
Submitting your vote...
stampè