Home
Noeles

De bugn resultac por i atlec dl Club Rodes Val Badia Raiffeisen

Do na sajun de gares cun la roda da munt metöda man ala fin de merz, ciarunse zoruch ai bugn resultac arjunc di atlec jogn.

Cun tröp impëgn, ligrëza y bona orenté, ái fat para cotan d’alenamënc y competiziuns VSS, Minibike y Südtirolcup, rovan ince a davagné deplü medaies y copes.

Rafael y Gabriel Tavella, David Granruaz y Adam Piccolruaz s’ l’á fata avarëi te deplü competiziuns y á batü sü aversars mioran da iade a iade, cina ch’ai é rová sön le podest.

Daniel Rungger á davagné en ocajiun dla finala VSS a Pichl Gsies le titul provinzial de easydown y la classifica generala de categoria. Tla classifica generala di esordiënc (secundo ann) dles gares de Südtirolcup é Marc Tavella y Daniel Rungger rová al 4. y al 6. post; tla categoria „allievi“ (secundo ann) é Giordan Nagler rové al 6. post.

Dër bun é ince jüdes les gares Minibike Fiemme-Fassa-Primiero, olache nüsc atlec ladins é stá bugn da nen davagné deplü. Ince chiló a Daniel Rungger davagné la malia de campiun dl zircuit de süa categoria.

L’ultim apuntamënt dla sajun por düc i atlec dl Rodes Val Badia denant ch’al mëtes man la sajun de ziclocross, sará ai 22 de setëmber: dales 09.30 inant gnarál tigní a San Linert l’ultima gara dl trofé Rodes Val Badia por jogn y jones; por i gragn gnará la gara soziala cuntra le tëmp tignida sön le percurs da l’ann passé, da San Linert cina sö Pransarores.

valutaziun
Submitting your vote...
stampè