Home
Sorvisc

Notizies dal Aiut Alpin Dolomites

Truep ntervënc à abù ntan l ultim fin dl ena la scuadra dl Aiut Alpin Dolomites. Ënghe sce l ie do la rata mo puec turisć te nosta valedes se à l joler mpo messù auze 14 iedesc danter vënderdi y dumënia. Trueps fova i ntervënc per persones che ova vel problemesc de sanità. Danter l auter dlongia l Seefeldsee ulache n ël de tëmp che fajova trëi vares al aria ie te n colp tumà ntëur. Si cumpani à riesc cherdà aiut ma canche n ie ruvei sun l post à l dutor me plu pudù cunstaté la mort dl ël de Maranzen. Chësc an ciarià tl joler y julà a Vintl ulache se à pona cruzià dla salma i judacrëp y i carabinieri.

 

Ntant ruova bel na cherdeda da n auter lech y plu avisa dal lech de Fìe. Tlo fova n ëila che ova de gran granfs. L se tratova de l mel san Valantìn. Ëila an julà te spedel de Bulsan.

N auter cajo de mort ie suzedù te Martell ulache n ël de Ciastel de 68 ani ie arsì nsëuralauter zënza plu dé sëni de vita. Ël fova pra na ciajea do che l ova fat na pitla jita. Ënghe te chësc cajo a l dutor me plu pudù cunstaté la mort dl ël.

A Al Plan fovel da purté aiut a na muta de 18 ani che se stentova dassënn a tré l fla y da iló iesen julei tla Val Travenanzes ulache n ël de l Schottland che fajova pea na garejeda de sauté ie tumà ntëur do che l fova bel sautà per 90 Km. Ël ova problemesc al cuer do n tel gran sforz y nsci l an julà te spedel de Bulsan.

 

A Ciastel univa cherdà l joler per n ël de 69 ani che stentova a tré l fla y fova drët stlet y per n jëunn de 28 ani che fova tumà ntëur sun l troi che porta da Ciaulong nchin pra la utia Marmotta fovel ënghe de bujën de l joler. Chisc n valguna dla emergënzes saniteres de l ultim fin dl ena.

Autri ntervënc fova danter l auter te Antholz ulache na turista belga fova sbrisceda ora sun n troi ert se fajan drët mel a na giama y se burian su dassënn l mus. Chësc ntervënt an fat n culaburazion cun i judacrëp de Antholz che la ova bel ciuleda su y njinieda ca per l trasport cun l joler.

 

Sun Mont de Sennes univa na cherdeda da na osta. Si pitla muta de 2 ani fova tumeda ju de banch de furnel batan dassënn l cë sun fonz. Canche n ie ruvei sun l post à l dutor riesc udù che l fova nia velch da sté ert. Pur mpo an julà la popa deberieda a si oma te spedel de Burnech per la lasce cialé do plu avisa.

L ie ënghe suzedù n nzidënt cun la roda y plu avisa sun i prei de Pralongià. Un che furnova cun sgors ju per i prei sota la utia Tablè cun la roda da mont ie tumà se fajan mel al fil dl spinel. Cun cautela l an ciarià tl sach vacuum y julà te spedel de Bulsan.

 

 

stampè