Home
Sorvisc

Notizies dal Aiut Alpin Dolomites

Truep iedesc se à auzà chëst’ena l joler dl Aiut Alpin Dolomites cun la scuadra de socors da la zentrela de Pontives per purté aiut a persones ferides o n dificultà. N à nuzà chisc dis ënghe per fé vel proa, nsci per ejëmpl na proa cun i dutores de la università da Padova. Per chësta iesen julei sun jëuf de Sela ulache n ti à spiegà plu avisa la tecniches de soccors. Vel dutor fajerà ënghe servisc tl joler dl Aiut Alpin y perchël iel de gran mpurtanza che l sebe co se astilé n cajo de n ntervënt.

N autra gran proa fova te Sulden cun i judacrëp dla Venuesta. L se tratova tlo de n curs sun dlacia a livel provinziel. Cun l joler an dantaldut menà sun l post truepa njinies che n adurova pona per la proa.

N cont de ntervënc fovel dantaldut tl fin dl ena truepa cherdedes, danter sada y dumënia bën 15. Bel n sada se tratovel plu iedesc de purté aiut a ciclisc che se njiniova ca per l gran avenimënt che fova la Maratona dles Dolomites dla dumënia. A Colfosch fova da purté aiut a n ël che fova tumà burt se fajan drët mel. Nsci an cherdà l joler per l julé te spedel.

Riesc do univa na cherdeda da San Ciascian, tlo se tratovel de purté aiut a n jëunn che fova tumà cun la roda da mont y se ova rot na sciabla.

Nia me cun la roda ma ënghe cun l motor iel suzedù n nzidënt, plu avisa te Sexten. N ël fova tumà te na raida cun si motor y tl prim ne semiovel nia tan grave. N ova cherdà na ambulanza che l ova ciarià per l mené te spedel, ma l ël se n stajova for plu mel y la tema fova che l ëssa vel lesions nternes. Perchël an cherdà l joler per l julé de prëscia te spedel de Bulsan .

A Proveis fova tumà n motociclist se fajan dassënn mel al spinel. Cun cautela l an metù te l sach vacuum per l stabilisé dan l julé te spedel.

Ënghe a jì a spaz tl luech iel vel periculi. Chësc à cunstatà n ëila de 78 ani dla Svizra che ie ciumpededa sun n tretuar a Sëuc. Ëila se ova fat drët mel a na sciabla . N à tlo tëut la dezijion n culaburazion cun l 112 de mandé sun l post l joler.

L pericul ie mpue dloncora. Chësc an udù pra n ëila tudëscia de 70 ani a Ciastel. Ëila fova te dlieja canche la ie ciumpededa se fajan n gran tai tl cë y la perdova scialdi sanch. L dutor la à ciuleda su y do chël la an juleda te spedel ulache i dutores ti a fat plu ponc tl cë.

L ruova ënghe ite na cherdeda da n luech da paur a Urtijëi ulache n jëunn fova tumà ntëur ntan che l fova dan cësa che siova. L dutor l à vijità y per precauzion an tëut la dezijion de l julé te spedel de Bulsan ulache i dutores l à vijità. Ël ie restà te spedel n usservazion.

N autra emergënza sanitera ie suzeduda a Barbian ulache n ova abinà n ël da nescia te si stua. L dutor minova che l pudëssa ti avëi striscià l bot al cuer.

Ënghe per n ëila de 80 ani de Corvara univa damandà l ntervënt dl dutor dl Aiut Alpin, ëila an julà te spedel de Burnech.

N dì lonch per la scuadra de socors fova la dumënia prim de lugio. Bel da mesa la 6 daduman iesen julei a La Ila per dé assistënza n cajo de bujën ai partezipanc dla Maratona dles Dolomites. Prësc univa ënghe bel la prima dumanda de socors. L se tratova de julé sun jëuf de Sela ulache fova tumà un dala roda se fajan drët mel a na sciabla. Canche n ova finà chësc ntervënt univa inò na cherdeda de socors. Chëst iede da Plan de Gralba ulache un dala roda ova batù dassënn l cë sun l asfalt do che l fova sbriscià ora.

For per na garejeda , ma chëst iede nia cun la roda ma de sauté univa do chël damandà l joler cun l dutor. L se tratova de na garejeda sun Porta Vescovo. N partezipant de 57 ani fova tumà ntëur sun n troi. A l ël ti ova dat l bot y ënghe sce n à purvà a l reanimé ne n iel plu stat nia da n fé. N à julà l corp zënza vita nchin a Reba ulache i judacrëp dl post l à menà tla capela di morc.

N cajo de mort ie ënghe suzedù tla cësa de paussa a Laion, ulache a n ëila de 59 ani ti ova dat l bot. Canche n ie ruvei sun l post a l dutor me plu pudù cunstaté la mort dl ëila .

A Santa Cristina fova n ël de 62 ani de Milan che ne dajova plu degun batimënt, purtruep ënghe te chësc cajo ne fovel plu nia da n fé.

stampè